Næsta hátíð í hátíðarbænum Hólmavík eru Hörmungardagar sem fara fram 26.-28. febrúar. Hátíðin er haldin að frumkvæði menningarfélagsins Arnkötlu og rúmar allt sem gæti talist hörmulegt á einn eða annan hátt. 

Nú þegar liggur fyrir að ungmenni ætla að leggja góðgerðarmálum lið, nýtt leikverk um dauðadóm verður frumflutt, tónleikar með sorgarlögum verða fluttir ásamt því að barsvar og fleira verður í boði. Vitanlega allt í samræmi við gildandi sóttvarnarreglur.

Öllum er frjálst að skipuleggja viðburð á hátíðinni og leita sér ráðlegginga við skipulag á þeim. Við hvetjum stofnanir, fyrirtæki, félagasamtök og einstaklinga til að nýta sér þetta tækifæri til að nálgast hefðbundin verkefni á nýjan hátt þannig að eftir verði tekið eða skapa eitthvað nýtt. Allar hugmyndir má senda á tomstundafulltrui@strandabyggd.is

 

Reykhólahreppur óskar eftir að ráða tvo sumarstarfmenn í 75-100% starf á Reykhólum við að sinna stuðningsþjónustu hjá 14 ára stúlku, í júní, júlí og ágúst. Vinnutími væri mánudaga til föstudaga frá 9:00-15:00.

Mjög skemmtilegt og krefjandi starf sem gæti hentað vel fyrir vinkonur eða par.

Möguleiki er á 100% starfi innan hreppsins og hjálp við að finna hentugt húsnæði ef starfsmenn óska þess.

Laun eru samkvæmt taxta Verk-Vest

Umsóknir sendist Soffíu Guðmundsdóttur, félagsmálastjóra, Hafnarbraut 25, 510 Hólmavík. Upplýsingar eru veittar í síma 451-3510 og fyrirspurnir má einnig senda á felagsmalastjori@strandabyggd.is.

 

Tilkynning frá Foreldrafélögum leik- og grunnskólans:

Vegna aðstæðna sem allir þekkja, þá verða ekki seldar rjómabollur í fyrirtæki þetta árið og þykir það okkur miður enda aðalfjáröflun okkar.  Ef fyrirtæki hafa samt áhuga á að veita okkur stuðning má leggja inn á reikninginn 1161-05-250550 kt. 701100-4170.

Á öskudaginn viljum við koma á breytingu í þetta sinn og fá fyrirtæki til að tilkynna hvort börn séu velkomin í fyrirtækin að syngja fyrir nammi eða hvort þau vilji takmarka þann aðgang.  Listinn verður síðan birtur í leik- og grunnskóla.  Einnig er mögulegt að fá foreldrafélagið til að afhenda glaðning til barnannna á öskudagsballinu.  Öskudagsballið verður haldið með takmörkunum í Félagsheimilinu á Hólmavík á öskudag kl. 17 en eingöngu geta foreldrar leikskólabarna fylgt þeim á ballið.

Tilkynningar um opin fyrirtæki eða lokuð berist til Stellu, á facebook, í s. 857-0991 eða á nefangið stellamagnusdottir@gmail.com sem fyrst.

Kæru íbúar Strandabyggðar,

Við spyrjum oft hvert annað;  hvað er að frétta?  Er ekki nóg að gera?"  Og víst er að það skortir ekki verkefnin.  Forstöðumannaskýrslur hafa lengi verið aðgengilegar á heimasíðu Strandabyggðar og eins hefur sveitarstjóri gjarnan miðlað upplýsingum um sín verkefni í pistlum á heimasíðunni.  Nú eru upplýsingar um þau verkefni líka aðgengilegar á heimasíðunni.

Við viljum hér með undirstrika þetta og hvejta ykkur til að skoða hvaða verkefni eru í gangi hjá starfsfólki Strandabyggðar á hverjum tíma.  Forstöðumannaskýrslur má nálgast hér og skýrslur sveitarstjóra hér.

Við viljum einnig hvetja íbúa til að hika ekki við að hafa samband, senda tölvupóst, hringja eða kíkja við og spjalla, koma þannig á frambæri athugasemdum eða spurningum um það sem kann að vera óljóst.  Það er alltaf best að ræða málin beint.

Kveðja
Þorgeir Pálsson
Sveitarstjóri Strandabyggðar

Ungmennaþing fór fram í hádeginu 3. febrúar síðastliðinn á Café Riis og á Zoom. Á dagskrá þingsins var kynning á starfi ungmennaráðs, framboð og kosningar auk pizzaveislu.Kosningar fara almennt fram að hausti en töfðust vegna reglubreytinga.

Kosið er í aðalsæti í ráðinu til tveggja ára í senn og því halda Unnur Viðarsdóttir, Jóhanna Rannveig Jánsdóttir og Valdimar Kolka Eiríksson sætum sínum. Marínó Helgi Sigurðsson og Þorsteinn Óli Viðarsson hlutu einnig kosningu sem aðalmenn.

...
Meira