Föstudaginn 28. janúar, klukkan 20:00, fer fram í Félagsheimilinu á Hólmavík úrslitakeppni í Vestfjarðarriðli söngkeppni Samfés. Þar munu 10 söngatriði frá Hólmavík, Ísafirði, Flateyri og Bolungarvík keppa um að komast í lokakeppni sem fram fer í Laugardagshöllinni, laugardaginn 5. mars. Eitt atriði verður valið um kvöldið af þriggja manna dómnefnd til að keppa í lokakeppninni, en þrjú efstu sætin fá vegleg verðlaun. Aðgangseyrir er 500 krónur fyrir 1.-10. bekk, en 1000 krónur fyrir 16 ára og eldri. Frítt fyrir börn yngri en 5 ára. Sjoppa félagsmiðstöðvarinnar verður að sjálfsögðu á staðnum.  

Fjögur söngatriði koma frá félagsmiðstöðinni Ozon á Hólmavík. Það eru þær Brynja Karen Daníelsdóttir sem sigraði söngkeppni Ozon síðasta föstudag með lagið Svo smá, Andrea Messíana Heimisdóttir með frumsamda lagið og textann Leyndarmál, Sara Jóhannsdóttir með lagið Án þín og Gunnhildur Thelma Rósmundsdóttir sem mun flytja lagið Lítill drengur. Fjölmargir hljóðfæraleikarar úr hópi Ozon-krakka koma fram í atriðunum. Strandamenn eru sérstaklega hvattir til að mæta og hvetja sitt fólk til dáða á föstudaginn.

Það eru tómstundafulltrúi Strandabyggðar og unglingarnir í félagsmiðstöðinni Ozon sem sjá um framkvæmd og skipulagningu keppninnar sem er einn stærsti viðburður fyrir unglinga á Vestfjörðum. Allir eru boðnir hjartanlega velkomnir og hvattir til að taka þátt í skemmtilegri stemmingu. Að keppni lokinni verður haldið diskótek fyrir 8.-10. bekk. Þar stjórna þeir DJ Danni og DJ Darri tökkum og rafmixi. Miðaverð á dansleikinn er krónur 500.

Félagsmiðstöðin Ozon stendur fyrir flöskusöfnun meðal íbúa á Hólmavík miðvikudagskvöldið 26. janúar. Söfnunin hefst klukkan 20:00 og stendur fram eftir kvöldi. Söfnunin er eflaust kærkomið tækifæri fyrir marga til að losa sig við birgðir sem safnast hafa upp um jól og áramót.

Allur ágóði af söfnuninni rennur beint til starfsemi Félagsmiðstöðvarinnar Ozon.

Hin árlega íþróttahátíð skólans fór vel fram í Íþróttamiðstöðinni á miðvikudaginn. Nemendur, starfsfólk og foreldrar skemmtu sér vel í leikjum og keppnum undir dyggri stjórn Kolbeins Skagfjörð íþróttakennara sem hélt utan um skipulag og framkvæmd hátíðarinnar. Fyrr um daginn fóru allir út að renna fyrir neðan Hólmavíkurkirkju en á hátíðinni fór fram hinn skemmtilegi klósettleikur, badmintonruna, boðhlaup, dodgeball, handbolti og trjónufótbolti. Að því loknu skelltu fjölmargir sér í sund eftir góðan og skemmtilegan íþróttadag.

Jón Jónsson fréttaritari á strandir.is tók skemmtilegar myndir af hátíðinni sem sjá má hér.

Nú er vorönnin að hefjast í Tónskólanum og þá gefst tækifæri til að skrá sig í eða úr Tónskólanum eða gera breytingar á tímum. Best er að hafa samband beint við tónlistarkennarana sjálfa, upplýsingar um símanúmer og netföng starfsmanna eru aðgengileg hér.

Einnig viljum við vekja athygli á breytingu á nýrri gjaldskrá fyrir Grunn- og Tónskólann var samþykkt á sveitarstjórnarfundi 18. janúar 2011. Breytingarnar taka gildi 1. febrúar 2011 og verða birtar á heimasíðu Strandabyggðar seinna í dag.

Ef einhverjar spurningar vakna er ykkur velkomið að hafa samband.

Góða helgi,
Hildur og Bjarni Ómar

Föstudaginn 21. janúar fer fram hin árlega Söngkeppni félagsmiðstöðvarinnar Ozon, en hún verður haldin í kjallara Grunnskólanum á Hólmavík. Sjö atriði af öllum stærðum og gerðum munu stíga á stokk. Þriggja manna dómnefnd velur síðan fjögur atriði sem fá keppnisrétt í Vestfjarðariðli landshlutakeppni Samfés sem verður haldin í félagsheimilinu á Hólmavík föstudaginn 28. janúar. Þá fær sigurvegarinn glæsilegan farandgrip til varðveislu í eitt ár.

Húsið opnar kl. 20:00 og allir eru hjartanlega velkomnir. Aðgangseyrir fyrir fullorðna er 500 krónur, krakkar á grunnskólaaldri borga kr. 100 en börn undir fimm ára aldri fá frítt inn. Sjoppa nemendafélagsins verður að sjálfsögðu opin og gargandi stemmning og mikið fjör í húsinu. Hólmvíkingar eru hvattir til að mæta á þessa skemmtilegu uppákomu í menningarlífinu og styðja við bakið á söngvurunum og starfsemi félagsmiðstöðvarinnar.

Grunnskólinn á Hólmavík stendur fyrir árlegri íþróttahátíð á miðvikudaginn 19. janúar kl. 18:00 í Íþróttamiðstöðinni á Hólmavík. Á hátíðinni skemmta börn og fullorðnir sér saman við íþróttir og leiki, en ekki er um beina keppni að ræða milli einstaklinga eða liða.

Dagskrá
Mæting nemenda og kennara kl. 17:45.

Kl. 18:00. Nemendur ganga inn í salinn með bekknum sínum og umsjónarkennara og setja hátíðina.

• Stutt ávarp frá nýjum tómstundafulltrúa Strandabyggðar Arnari S. Jónssyni.
• 1. og 2. bekkur: Klósettleikurinn. Foreldrar og nemendur taka þátt.
• 3. og 4. bekkur: Þrautaboðhlaup. Foreldrar og nemendur taka þátt.
• 5. og 6. bekkur: Brennibolti. Foreldrar og nemendur taka þátt.
• 7. bekkur: Badmintonruna. Foreldrar og nemendur taka þátt.
• 8. og 9. bekkur: Dodgeball. Foreldrar og nemendur taka þátt.
• 10. bekkur: Handbolti. Foreldrar og nemendur taka þátt.
• 10. bekkur: Trjónufótbolti. Nemendur keppa við kennara.

Drykkir og samlokur verða seldar á staðnum á vægu verði og rennur ágóðinn í nemendasjóð (ekki posi á staðnum). Eftir íþróttahátíðina býður grunnskólinn í sund og minnir á að þeir sem eru 10 ára og yngri verða að vera í fylgd með eldri en 16 ára.

Allir eru velkomnir á íþróttahátíðina.

Bjarni Ómar Haraldsson skólastjóri við Grunn- og Tónskólann á Hólmavík hefur nú látið af störfum sem forstöðumaður félagsmiðstöðvarinnar Ozon eftir margra ára farsælt og gott starf þar með krökkunum. Bjarna Ómari er þakkað kærlega fyrir starf hans við félagsmiðstöðina.

Arnar Snæberg Jónsson hefur nú tekið við nýju starfi tómstundafulltrúa Strandabyggðar en í því starfi felst meðal annars umsjón með félagsmiðstöðinni Ozon. Arnar hefur nú fundað með Bjarna Ómari og nemendaráði og fer starf félagsmiðstöðvarinnar í gang í vikunni 10. - 14. janúar og er margt spennandi á dagskránni hjá þeim. Hægt verður að fylgjast með fréttum og tilkynningum á síðu Ozon hér undir valmyndinni vinstra megin á vef skólans.

Arnar er með B.A. gráðu í tómstunda og félagsmálafræðum frá Menntavísindasviði Háskóla Íslands. Hann hefur undanfarin ár gegnt stöðu framkvæmdastjóra Sauðfjársetursins á Sævangi og verið leiðandi í uppbyggingu þess og markaðssetningu. Arnar er í stjórn Menningarráðs Vestfjarða og hefur gegnt ýmsum trúnaðarstörfum fyrir sveitarfélagið Strandabyggð með setu í nefndum og ráðum. Arnar starfar einnig sem stundakennari í lífsleikni, tónmennt, upplýsingatækni og leikrænni tjáningu við Grunn- og Tónskólann á Hólmavík.  

  

Arnar Jónsson er boðinn velkominn til starfa.

Fyrsta vika ársins fór vel af stað í Grunn- og Tónskólanum á Hólmavík og það var virkilega gaman að hitta nemendur og starfsfólk að loknu jólafríi og ágætt að komast í rútínuna aftur. Vikan endaði reyndar með því að skólastarfið féll niður á föstudaginn vegna aftakaveðurs og rafmagnsleysis sem gekk yfir norðanvert landið. Við vonumst nú til þess að það gerist ekki aftur á næstunni en hvetjum foreldra til þess að hlusta á tilkynningar í morgunútvarpi Rásar2 eða fréttatíma útvarpsins, athuga á vef skólans, síðu Strandabyggðar á Facebook eða hafa samband við okkur símleiðis ef að aðstæður eru þannig að vafi liggur á um hvort að það sé skóli eða ekki.

Nýárskveðjur,
Hildur og Bjarni Ómar.

Allt skólastarf í Grunn- og Tónskólanum á Hólmavík fellur niður í dag, föstudaginn 7. janúar, vegna aftakaveðurs sem gengur nú yfir norðanvert landið.

Nemendur í Tónskólanum verða með lifandi jólatóna í Kaupfélagi Steingrímsfjarðar í dag, föstudag kl. 17:00 en þeir munu einnig leika tónlist þar á sama tíma klukkan 17:00 - 18:00 miðvikudaginn 22. desember og þorláksdag, fimmtudaginn 23 desember. Við hvetjum alla til að kíkja og hlusta og upplifa jólastemmninguna Kaupfélaginu. Sjá dagskrá hér.

Jólakveðjur úr Tónskólanum.