Nú er að hefjast ein skemmtilegasta vika ársins, að mati margra, með tilheyrandi skemmtilegheitum á bolludegi, sprengidegi og öskudegi. Á bolludaginn er nemendum velkomið að taka með sér bollu í nesti. Á sprengidag verða líklega flestir með miklifenglegar átveislur með alskonar meðlæti og á öskudag, miðvikudaginn 9. mars, er starfsdagur hér við skólann og því frí hjá nemendum. Hið vinsæla öskudagsball verður að venju í félagsheimilinu og mun foreldrafélag grunnskólans halda utan um það og auglýsa. GÓÐA SKEMMTUN!

Grunnskólinn á Hólmavík tók þátt í hvatningarleik Lífshlaups Íþrótta- og Ólympíusambands Íslands sem hófst 2. febrúar og stóð í 20 daga. Skólinn lenti hvorki meira né minna en í 2. sæti í sínum flokki en nemendur skráðu hreyfistig sín á vef Lífshlaupsins www.lifshlaupid.is. Það var 7. bekkur hreyfði sig hlutfallslega mest af bekkjum skólans eða í 18.780 mínútur eða 939 mínútur á dag að meðaltali. Þar fast á eftir komu nemendur í 1. og 2. bekk. Á meðfylgjandi mynd má sjá prósentuskiptingu á hreyfingu nemenda skólans. Íþrótta- og Ólympíusambandið sendi okkur verðlaunaplatta til eignar og var það Laufey Heiða afmælisbarn dagsins sem tók á móti plattanum fyrir hönd 7. bekkjar sem fær að hafa hann inni í stofunni sinni fyrst um sinn. Við þökkum nemendum okkar innilega fyrir skemmtilega keppni og óskum þeim til hamingju með árangurinn.

 

 

 

Í dag halda nemendur í 8.-10. bekkur á Samféshátíðina í Reykjavík undir stjórn Arnars Jónssonar tómstundafulltrúa. Þau byrja á því að fara út að borða seinnipartinn en fara svo á ball í Laugardalshöllinni í kvöld. Á laugardag fara þau á söngvakeppni Samfés, í Laser-Tag í Kópavogi, Go-Kart í Garðabæ, bíóferð, diskókeilu í Öskjuhlíðinni og skauta í Egilshöll. Það verður án efa mikið fjör og rosalega gaman hjá þeim. Þau koma síðan heim um kvöldmatarleytið á sunnudaginn. GÓÐA SKEMMTUN KRAKKAR!

Á föstudaginn ætlum við að gera okkur glaðan dag með því að hafa náttfatadag, þá mega nemendur koma í náttfötum í skólann. Náttfatadagurinn er hluti af skemmtilegum föstudögum fram að páskafríi. SJÁUMST HRESS Í NÁTTFÖTUM!

Stjórnarfundur var haldinn í foreldrafélagi Grunnskólans á Hólmavík 22. febrúar í Þróunarsetrinu á Hólmavík. Þar var rætt um bolludaginn, öskudaginn, forvarnarstarf, starf bekkjarfulltrúa, jólaföndur og aðild að Heimili og skóla. Fundargerð frá fundinum má sjá hér.

Það er ánægjulegt að fylgjast með störfum stjórnarinnar og bekkjarfulltrúanna í vetur. Haldnir hafa verið fundir foreldra í ýmsum bekkjardeildum, spilasamverur, gönguferð, ferð í fjárhúsin og fleira skemmtilegt. Einnig hefur verið mikil ánægja með foreldrakaffi með skólastjórnendum sem verða endurtekin í bráð. Það hafa margir foreldrar komið með góðar, gagnlegar og uppbyggjandi ábendingar inn í starfið okkar og hefur það sýnt sig að samstarf við foreldra hefur áhrif á velgengni og vellíðan barna í skólanum. Aðild foreldra, jákvæð viðhorf þeirra og hvatning afar mikilvægur liður í skólastarfinu því saman gerum við góðan skóla betri.

Borist hafa fréttir frá nemendum 7. bekkjar sem taka nú þátt í glæsilegri dagskrá í skólabúðunum í Reykjaskóla. Þau hafa nú farið í ýmsa leiki, íþróttir og sund, fjöruferðir, fræðst um undraheim auranna og heimsótt Byggðasafn Húnvetninga og Strandamanna, farið í nokkra vermannaleiki og þar stendur sem kunnugt er Hákarlaskipið Ófeigur og nýtur verðugrar athygli. Frjálsir tímar í Bjarnaborg eru vel nýttir í borðtennis, billjard, þythokkí, kaplakubba, spil, lestur, spjall eða bara hvíld.

Þau Almar, Andri, Benedikt, Branddís, Elísa, Eyrún, Guðfinnur, Gunnar, Ísak, Kristín, Laufey, Númi, Róbert, Sigfús, Símon, Sunneva, Tómas, Þórir, Steinar og Hrafnhildur senda bestu kveðjur til okkar allra og hafa sett inn myndir sem skoða má hér.

- VIÐ SENDUM ÞEIM OKKAR BESTU KVEÐJUR TIL BAKA, haldið áfram að hafa það frábært og takk fyrir myndirnar :o)

Í gær héldu nemendur 7. bekkjar af stað í skólabúðir að Reykjum í Hrútafirði ásamt Hrafnhildi Guðbjörnsdóttur umsjónarkennara og Steinari Inga Gunnarssyni stuðningsfulltrúa. Það skein mikil gleði, spenna og tilhlökkun úr augum nemendanna þegar þau mættu með farangurinn í rútuna í gærmorgun. Þau munu dvelja þar út vikuna og taka þátt í starfinu í skólabúðunum sem beinist í öllum aðalatriðum að sömu markmiðum og starfið í almennum grunnskóla með áherslu á að skapa samstöðu og efla samvinnu milli nemenda og kennara, auka félagslega aðlögun nemenda og þroska sjálfstæði nemenda. Þessa viku eru líka nemendur frá Drangsnesi og Akureyri á Reykjum. Við fréttum að ferðin hafi gengið vel og að gærdagurinn hafi vakið mikla lukku þar sem nemendur komu sér fyrir á herbergjum sínum og kynntust svæðinu. Þau fóru í stöðvaleiki, íþróttir, náttúrufræði, þythokký, borðtennis, tóku þátt í kvöldvöku og fengu hressingu fyrir svefninn.

Á föstudaginn ætlum við að gera okkur glaðan dag með því að hafa sætabrauðsdag, þá mega nemendur koma með köku eða annað sætabrauð í nesti í skólann. Sætabrauðsdagurinn er hluti af skemmtilegum föstudögum fram að páskafríi.

Á laugardaginn tóku nemendur Tónskólans á Hólmavík þátt í skemmtun í Félagsheimilinu þar sem Lionsklúbbur Hólmavíkur fagnaði 50 ára afmæli klúbbsins með glæsilegri afmælishátíð. Þær Gunnur Arndís Halldórsdóttir, Sara Jóhannsdóttir og Stella Guðrún Jóhannsdóttir fluttu nokkur tónlistaratriði fyrir afmælisgesti. Það er gaman frá því að segja að Lionsklúbbur Ísafjarðar færði Tónskóla Hólmavíkur gjafabréf að upphæð kr. 100.000 til styrktar því öflugu tónlistarlífi sem Tónskólinn stendur fyrir á Ströndum. Fyrir hönd Tónskólans þökkum við kærlega fyrir þennan rausnarlega og hverjandi styrk frá Lionsklúbbi Ísafjarðar og sendum Lionsklúbbi Hólmavíkur hamingjuóskir með hálfrar aldar afmælið og óskum þeim farsældar í áframhaldandi starfi.

Í síðustu viku skellti 3. og 4. bekkur sér í flokkunarstöð Sorpsamlagsins á Skeiði ásamt umsjónarkennara sínum henni Ingibjörgu Emilsdóttur. Heimsóknin var í tengslum við námsefnið og bókina Komdu og skoðaðu hringrásir þar sem fjallað er um hringrásir í náttúrunni með áherslu á námskrá í náttúrufræði og samfélagsgreinum. Þar er greint frá stöðugum hringrásum efna á jörðinni og undirstrikað mikilvægi þess að umgangast auðlindir jarðar af virðingu. Einar Indriðason tók á móti hópnum og fræddi þau um flokkana og ýmislegt fleira tengt rusli og endurvinnslu. Hér má sjá myndir frá heimsókninni.

Þessi hópur fékk líka skemmtilegt og óvenjulegt heimaverkefni sem var að búa til eitthvað úr rusli þar sem þau áttu að endurnýta eitthvað gamalt „drasl" og gera úr því nýjan hlut. Þau máttu ekki kaupa neitt í verkefnið nema nagla eða lím. Myndirnar hér tala sínu máli um útkomuna sem var alveg frábær!

Á hverjum fimmtudegi eru þau í 3. og 4. bekk með útinám þar sem skóladagurinn fer að mestu fram utandyra. Um daginn heimsóttu þau Orkubú Vestfjarða og fengum að skoða Þverárvirkjun. Heimsóknin þótti rosalega spennandi og skemmtileg og ekki spillti fyrir að þau fengu líka að sjá díselvélina sem er geymd hérna inn á Hólmavík, en hún er notuð þegar rafmagnið fer af. Það hefur verið gaman að fylgjast með þeim fjölbreyttu verkefnum sem þau hafa verið að fást við og því skapandi skólastarfi sem fer fram undir leiðsögn Ingibjargar.