Hulda Ingibjörg Rafnarsdóttir hefur verið ráðin skólastjóri Grunn- og tónskólans á Hólmavík í tímabundna stöðu til vors 2013. Hulda var ráðin aðstoðarskólastjóri í ágúst síðastliðnum, en Hildur Guðjónsdóttir sem tók við starfi skólastjóra um svipað leyti hefur sagt upp og látið af störfum. Hulda Ingibjörg er fædd árið 1965 og er útskrifaður grunnskólakennari frá Kennaraháskóla Íslands árið 1995 og hefur einnig lokið námi í kerfisfræði. Hulda er með diplómu í menningarstjórnum frá Háskólanum á Bifröst og fæst nú við skriftir á MA-ritgerð. Hún hefur víðtæka og fjölbreytta kennslureynslu, t.d. við Vatnsendaskóla í Kópavogi, Grunnskólann á Blönduósi og einnig við kennslu og verkefnastjórn við Háskólann á Bifröst.

Vegna veðurútlits eru foreldrar yngri barna beðnir um að gera viðeigandi ráðstafanir og sækja börnin sín að loknu skólahaldi.  Nemendur sem fara með skólabíl verða keyrðir heim upp úr kl. 12.30 í dag.

Í gær, fimmtudaginn 8. nóvember, var baráttudagur gegn einelti haldinn í skólanum okkar. Starfsfólk og nemendur komu þá saman á sal, allir fengu afhent armbönd með skilaboðum um jákvæð samskipti og síðan skrifuðu allir nemendur og starfsfólk undir þjóðarsáttmála um baráttu gegn einelti á vefsíðunni gegneinelti.is.

Dagurinn í gær er í raun byrjun á stærra verkefni um baráttu gegn einelti sem mun standa yfir í allan vetur og allir í skólanum taka þátt í. M.a. er stefnt er að því að koma upp listaverki hönnuðu af nemendum í elstu bekkjum í umsjón Ástu Þórisdóttur listgreinakennara. Þá eru einnig á döfinni fræðsla, uppákomur og fleira í vetur. Fréttir af þessu verða að sjálfsögðu fluttar hér á vefnum.

Fimmtudagurinn 8. nóvember nk. er baráttudagur gegn einelti hér á landi. Við í Grunnskólanum á Hólmavík erum staðráðin í að taka virkan þátt í þessum góða degi og í undirbúningi er stutt en táknræn dagskrá fyrir alla nemendur og starfsfólk skólans sem verður betur kynnt í næstu viku. Meðal þess sem verður gert er að skrifa undir þjóðarsáttmála gegn einelti á heimasíðunni gegneinelti.is. Á þessum degi er þjóðin hvött til að standa saman gegn einelti í samfélaginu; samtök og vinnustaðir eru hvattir til að beina sjónum að jákvæðum samskiptum, jákvæðum skólabrag og góðum starfsanda....
Meira

Í dag var Forvarnardagurinn haldinn í Grunnskólanum á Hólmavík. Dagurinn beinist fyrst og fremst að nemendum í 9. bekk um land allt, en í skólanum okkar er þessum bekkjum kennt saman og því tóku þeir báðir þátt í deginum. Arnar Snæberg Jónsson hafði umsjón með deginum í grunnskólanum, en hann fól það m.a. í sér að krakkarnir horfðu á kynningarmyndband um forvarnardaginn, sáu hvatningarmyndband með ýmsum landsþekktum einstaklingum og unnu síðan hópavinnu þar sem farið var yfir hvað krökkunum finnst um samveru fjölskyldunnar, æskulýðs- og íþróttastarf og áfengisneyslu.

Krakkarnir stóðu sig frábærlega í þessari vinnu og komu hóparnir niðurstöðum sínum skilmerkilega og skýrt á blað. Hægt er að sjá niðurstöðurnar með því að smella hér.

Undanfarna þrjá daga hafa þemadagar verið í gangi í skólanum okkar - og í dag lýkur þeim með opnu húsi milli kl. 12:00 og 14:00. Heilmikið hefur verið um að vera - heilt bæjarfélag hefur t.a.m. risið á skólalóðinni, furðuverur svífa um gangana og tilraunagengið hefur m.a. búið til hraunlampa. 

Allir eru hjartanlega velkomnir á opna húsið í dag - föstudaginn 26. október!

 

Miðvikudaginn 24. október kl. 19:30 verður haldinn fyrirlestur í Félagsheimilinu á Hólmavík um netfíkn. Sálfræðingurinn Eyjólfur Örn Jónsson fjallar í fyrirlestrinum um hættur Internetsins, hverjir séu í hættu með að "ánetjast" notkun sinni, hver einkenni ofnotkunar eru, hvað slík notkun getur haft í för með sér og hvað foreldrar og fagfólk getur gert til að fyrirbyggja vandann og takast á við hann. Eftir fyrirlesturinn verða umræður og fyrirspurnir.

Við í Grunnskólanum hvetjum fólk á öllum aldri til að mæta á þennan fróðlega fyrirlestur sem veitir innsýn í málefni sem kemur okkur öllum við og er vaxandi vandamál á Íslandi - og þar er Strandabyggð ekki undanskilin. Frítt er inn á fyrirlesturinn og allir áhugasamir eru velkomnir á hann....
Meira

Í dag hlupu nemendur Grunnskólans á Hólmavík Norræna skólahlaupið. Nemendur hlupu 2,5 km, 5 km eða 10 km og er markmið hlaupsina að hvetja nemendur til þess að æfa hlaup og auka með því útiveru og hreyfingu og kynna og skýra nauðsyn þess að hreyfa sig, reyna á líkama sinn og stuðla þannig að betri heilsu og vellíðan. Það var Árdís Rut Einarsdóttir sem skipulagði hlaupið í ár og tókst það í alla staði vel. Allir þátttakendur fá sérstakt viðurkenningarskjal fyrir þátttökuna.

Árið 2012 er tileinkað öldruðum í Evrópu. Megináherslan er á að auka virkni og færni aldraðra, bæta menntun og brúa kynslóðabilið. Stjórnvöld í Evrópu hafa beitt sér fyrir margvíslegum aðgerðum í tilefni af Evrópuári aldraðra. Landssamband eldri borgara hefur leitað til mennta- og menningarmálaráðuneytisins og óskað eftir því að athygli grunnskóla verði vakin á Evrópuárinu og sérstaklega alþjóðadegi eldri borgara í skólum 1. október. Af því tilefni komu félagar eldri borgara á Hólmavík í heimsókn í skólann okkar. Þau heimsóttu nemendur og kennara í 5.-7. bekk. Formaður félagsins, Maríus Kárason, kynnti félagið og starfsemi þess. Nemendur voru búnir að undirbúa komuna með spurningum sem þau leituðu svara við og komust að því að eldri borgarar í Strandabyggð sitja ekki auðum höndum heldur eru dugleg að hittast og föndra, iðka boccia, smíði, lestur fyrir vistmenn sjúkrahússins og gönguferðir. Félögum eldri borgara er þakkað kærlega fyrir komuna og þetta góða tækifæri þar sem ungir og aldnir fái tækifæri til að hlusta hvert á annað, kynnast og ræða saman.

Nemendur í 5.-7. bekk hafa í haust unnið með og kynnst hinum ýmsu trúarbrögðum í samfélagsfræði hjá Kolbrúnu og Möllu Rós. Trúarbragðafræði er orðin hluti af sjálfstæðum námsgreinum í grunnskóla en hefur ráðstöfunartíma sameiginlega með samfélagsgreinum í viðmiðunarstundaskrá. Nú er aukin áhersla á önnur trúarbrögð en kristni sem verður að teljast eðlilegt í ljósi vaxandi fjölmenningar í landinu og aukinna tengsla á milli ólíkra menningarsvæða í veröldinni. Á haustönn hafa nemendur okkar kynnst búddatrú, hindúatrú, kristni, islam og gyðingdómi. Í síðustu viku fengu þau góðan gest til sín til að kynna islamstrú. Alma er gift Hicham Mansri sem er islamstrúar og búa þau hér á Hólmavík ásamt dóttur sinni Amiru Lindu. Eins og sjá má á myndunum kom Alma prúðbúin og sýndi nemendum ýmsa muni sem tengjast islamstrú. Hún leyfði börnunum líka að máta föt sem hún kom með og þau höfðu mjög gaman af því. Við þökkum Ölmu kærlega fyrir góða heimsókn og kynningu.