Í gær, 2. júní, fóru nemendur og starfsfólk, ásamt vöskum starfsmönnum Áhaldahúss, á stjá og hreinsuðu bæinn. Áður höfðu nemendur sent dreifibréf í hús þar sem íbúar voru hvattir til að taka til hjá sér og setja ruslið fyrir utan lóðamörk sín þar sem nemendur kæmu og hirtu það. Sveitarstjórn Strandabyggðar hafði heitið á nemendur 100 kr. fyrir hvert kíló af rusli sem safnaðist. Skemmst er frá því að segja að verkefnið gekk fram úr öllum vonum. Íbúar tóku vel við sér og heilmikið af rusli var tekið frá þeim en einnig var rusl af víðavangi tínt upp í söfnunina. Alls söfnuðust 2.620 kg af rusli. Fyrirfram vonuðumst við til að slá gamla metið okkar sem var 500 kg og það tókst svo sannarlega. Við vilju þakk íbúum fyrir að taka svo vel í verkefnið og einnig viljum við sérstaklega þakka áhaldahúsmönnum fyrir aðstoðina.   

Í dag fór fram verðlaunaafhending í Norræna húsinu í verkefninu Landsbyggðarvinir - Sköpunargleði, heimabyggðin mín, nýsköpun, heilbrigði og farvarnir.

Það voru nemendur úr fjórum skólum sem kynntu verkefnin sín; Grunnskólinn í Hrísey, Grunnskólin Hofgarðar í Öræfum, Víðistaðaskóli og Grunnskólinn á Hólmavík. Íris Jóhannsdóttir og Kristný Maren Þorvaldsdóttir kynntu verkefnið sitt Smokkar í Ozon  og þeir Guðjón Alex Flosason, Jamison Ólafur Johnson og Trausti Rafn Björnsson kynntu verkefnið Frjálsíþróttavöllur á Hólmavík. Bæði verkefnin hlutu viðurkenningarskjöl fyrir sitt framlag en einnig fengu allir bol landsbyggðarvina að gjöf.

Fyrstu verðlaun hlutu Ísak Leví Þrastarson, Bára Örk Melsted og Sunneva Guðrún Þórðardóttir fyrir verkefnið  Bókmennta- og ljóðavika á Hólmavík. Verkefnið deildi fyrsta sæti með verkefni frá Grunnskólanum Hofgörðum. Allir fengu viðurkenningarskjal, bol og 50.000 kr sem skiptist á milli höfunda verkefnana tveggja.

Við óskum öllum þátttakendum og verlaunahöfum til hamingju með daginn og glæsilegan árangur

Föstudaginn 23. maí heimsækir Háskólalestin Grunnskólann á Hólmavík. Nemendum í 5. - 10. bekk verður boðið upp á valin námskeið úr Háskóla unga fólksins. Lögð er áhersla á lifandi og skemmtilega vísindamiðlun.
Nemendur velja sér þrjú námskeið en námskeiðin sem verða í boði eru eðlisfræði, efnafræði, stjörnufræði, japanska og vísindaheimspeki. 
Á laugardeginum verður öllum heimamönnum boðið upp á vísindaveislu í Félgasheimilinu. Allir eru velkomnir og aðgangur er ókeypis

...
Meira

Í kvöld, miðvikudaginn 14. maí og annaðkvöld, fimmtudaginn 15. maí verða vortónleikar Tónskólans á Hólmavík haldnir í Hólmavíkurkirkju. Þar munu nemendur Tónskólnas koma fram og flytja afrakstur vetrarins.
Tónleikarnir hefjast kl. 19.30 bæði kvöldin.

Allir eru hvattir til að koma og hlíða á undurfagra tóna nemenda.

Úrslitakeppni Stærðfræðikeppni FNV, MTR og 9. bekkjar fór fram í dag í húsnæði FNV á Sauðárkróki. Guðjón Alex Flosason nemandi í 9. bekk i Grunnskólanum á Hólmavík var einn 15 grunnskólanema sem komst áfram í úrslitakeppnina.

Guðjón Alex hreppti þriðja sætið og að launum hlaut hann vegleg verðlaun eins og sjá má á meðfylgjandi mynd. Auk verðlaunabikars hlaut hann m.a. prentara og vasareikni.

Við óskum Guðjóni Alex innilega til hamingju með þennan framúrskarandi árangur!

Umhverfisdagurinn var haldinn hátíðlegur í dag. 

Dagskráin hófst með ratleik við skólann og endaði inn við Stóru Grund. Á leiðinni leystu hóparnir ýmsar þrautir m.a. voru ljóð samin, reikna þurfti út samanlagðan aldur hópsins og finna meðal aldur, finna egg, búa til pappírsbát og láta hann sigla, finna fötu og skóflu. Á Stóru Grund fóru hóparnir í keppni um "að fleyta kerlingar" og að byggja kastala úr þeim efnivið sem fannst í fjörunni.

Bóndinn á Stóru Grund bauð upp létta hressingu fyrir hópinn; djús og kex sem var þegin með þökkum.

Dagurinn tókst mjög vel og ekki skemmdi fyrir að vel viðraði til útiveru í dag.

Þriðjudaginn 29. apríl fór fram kynning á verkefnum sem nemendur í 8. -10. bekk Grunn- og tónskólans á Hólmavík tóku þátt í. Þetta var seinni hluti verkefnisins, en í fyrri hlutanum, sem fram fór fyrir áramót, skrifuðu nemendur ritgerðir um það sem þeim fannst að betur mætti fara í heimabyggð þeirra og komu með ýmsar hugmyndir þar að lútandi. Í þessum seinni hluta unnu nemendur í litlum hópum að verkefnum sem þau völdu að vinna með. Afraksturinn var svo kynntur í dag, alls 8 verkefni. Dómnefnd valdi síðan þrjú verkefni sem halda áfram í keppni. Dómnefnd skipaði Dr. Páll Líndal, umhverfissálfræðingur, Eygló Bjarnardóttir, lífeindatæknir og Sigurður Atlason, framkvæmdastjóri Strandagaldurs.

Þrjú verkefni voru valin til frekari þátttöku í verkefninu og munu þau verða kynnt í Norrænahúsinu þann 22. maí nk. Eftirfarandi verkefni voru valin:
1. Bókmennta- og ljóðavika á Hólmavík. Höfundar: Bára Örk Melsted, Ísak Leví Þrastarson og Sunneva Guðrún Þórðardóttir.
Í umsögn dómnefndar þótti verkefnið frumlegt og skemmtilegt, hafa menningarlegt gildi og vera vel framkvæmanlegt.

2. Smokkar í Ozon. Höfundar: Íris Jóhannsdóttir og Kristný Maren Þorvaldsdóttir.
Í umsögn dómnefndar þótti verkefnið hugað og að það þyrfti áræðni til að vinna að slíku verkefni um hluti sem alla jafna væru feimnismál. Þetta verkefni er nú þegar komið til framkvæmda.

3. Frjálsíþróttavöllur á Hólmavík. Höfundar: Guðjón Alex Flosason, Jamison Ólafur Johnson og Trausti Rafn Björnsson.
Í umsögn dómnefndar segir að þetta verkefni hafi mikinn samfélagslegan ávinning ef til framkvæmda komi og kynningin þótti sérstaklega fagmannleg og skýr. 

Við óskum nemendum til hamingju með flottar hugmyndir og skemmtilegar kynningar og þeim verkefnum sem valin voru áfram óskum við góðs gengis í framhaldskeppninni í Reykjavík.

~Ásta Þórisdóttir~

 

Í vetur hafa nemendur í 8.-10 bekk tekið þátt í verkefninu Landsbyggðarvinir: Sköpunargleði - Heimabyggðin mín - Nýsköpun - Heilbrigði og forvarnir.

 

Áhersla er lögð á að fá fram góðar hugmyndir sem stuðla að nýsköpun í heimabyggð, hvort sem það er á sviði velferðar og forvarna, atvinnulífs eða tekjuöflunar fyrir sveitar- eða bæjarfélagið.

 

Verkefninu er skipt í tvo hluta. Fyrri hlutinn  er einstaklingsvinna og hlutu fjórar ritgerðir frá nemendum Grunnskólans á Hólmavík 4. verðlaun í þeim hluta. Síðari hlutinn er hópverkefni og felst í  útfærslu á bestu hugmyndum sem komu fram í fyrri hlutanum og gefa fyrirheit um betri og lífvænlegri heimabyggð. 

Á morgun, þriðjudaginn 29. apríl, kl. 15.00 munu nemendur kynna verkefni sem unnin hafa verið í vetur undir leiðsögn Ástu Þórisdóttur og Eiríks Valdimarssonar. Kynningin fer fram í Félagsheimilinu og er dagskrá dagsins  sem hér segir:

 

Kl. 15.00 - Kynning á verkefnum

Kl. 15.45  - Kaffihlé á meðan dómnefnd er að störfum

Kl. 16.15  - Úrslit kynnt

Kl. 16.30  - Dagskrár lok.

Allir velkomnir