Dagur íslenskrar náttúru er í dag en hann er haldinn hátíðlegur í fyrsta sinn. Ákveðið var í fyrra, á sjötugsafmæli Ómars Ragnarssonar, að tileinka 16. september ár hvert íslenskri náttúru. Efnt verður til viðburða víða um land í tilefni dagsins. Í tilefni dagsins héldu kennarar og börn úr Vopnafjarðarskóla inn í Sandvík og hreinsuðu rusl úr þessari perlu sem Sandvíkin er.

Landhelgisgæslunni barst kl. 06:16 neyðarkall á rás 16 frá vélarvana 12 tonna línubáti sem leki hafði komið að í miðjum Seyðisfirði. Fjórir menn eru um borð. Ágætt veður er á svæðinu. Landhelgisgæslan hafði þegar í stað samband við sjóbjörgunarsveitir Slysavarnarfélagsins Landsbjargar á svæðinu og eru nú harðbotnabjörgunarbátar frá Seyðisfirði og Norðfirði, auk björgunarskipsins Hafbjargar frá Norðfirði á leið til aðstoðar.Sveinbjörn Sveinsson lagði af stað kl. 0630 en honum var snúið við þegar ljóst var að nægar bjargir væru komnar á svæðið.

Um síðustu helgi fóru smalar í Hauksstaðaheiði til að sækja þær skjátur sem bændur slepptu á fjall í vor. Oft hefur veðrið verið hagstæðara á smala og já stundum verra en ágætlega smalaðist þrátt fyrir það. Ástæðan er að sjálfsögðu sú að um einmuna lið smala var á ferð sem þekkir heiðarnar eins og lófana á sér, svo var líka gott veður á laugardaginn. Þegar smalar komu til byggða á sunnudaginn var hins vegar kalt og blautt og lítið skyggni en fólk lét það ekki á sig fá og voru þó nokkuð margir mættir í réttir til að berja safnið augum og spjalla við bændur og já, draga fé í dilka.

Ingi Eðvaldsson verkstjóri vegagerðarinnar á Vopnafirði sagði mér í dag að nýi vegurinn um Vesturárdal væri nú opinn fyrir allri umferð, búið væri að setja stikur en það á eftir að sópa lausa malarlaginu af síðustu 9 km fyrir ofan Hauksstaði og þar er hraðatakmörkun 50 km. Þetta er að sjálfsögðu bylting í vegamálum hér á Vopnafirði , að geta loks farið á bundnu slitlagi til Reykjavíkur frá Vopnafirði ef menn velja það. Síðasti kaflinn verður sópaður eftir helgi en sjálf verklokin verða næsta sumar en það á eftir að laga vegaxlir og annan frágang. Til hamingju Vopnfirðingar.

Í gær var farið með krakkana úr Vopnafjarðarskóla í göngutúra um nærliggjandi fjöll, þau yngstu fóru á Fagrafjall og þau sem eru örlítið eldri fóru upp á Sjónvarpshæð. 5. og 6. bekkur fóru upp á Torfastaðanúp og sjöundi, áttundi og níundi bekkur fóru upp í Svínabakkafjall og þau elstu fóru upp á Krossavíkurfjöll. Veðrið lék við börnin og kennara þeirra í ferðinni en 20 stiga hiti var um hádegið. Myndirnar sem Bjarney G. tók fyrir ofan Svínabakka tala sínu máli.