Ingi Eðvaldsson verkstjóri vegagerðarinnar á Vopnafirði sagði mér í dag að nýi vegurinn um Vesturárdal væri nú opinn fyrir allri umferð, búið væri að setja stikur en það á eftir að sópa lausa malarlaginu af síðustu 9 km fyrir ofan Hauksstaði og þar er hraðatakmörkun 50 km. Þetta er að sjálfsögðu bylting í vegamálum hér á Vopnafirði , að geta loks farið á bundnu slitlagi til Reykjavíkur frá Vopnafirði ef menn velja það. Síðasti kaflinn verður sópaður eftir helgi en sjálf verklokin verða næsta sumar en það á eftir að laga vegaxlir og annan frágang. Til hamingju Vopnfirðingar.

Í gær var farið með krakkana úr Vopnafjarðarskóla í göngutúra um nærliggjandi fjöll, þau yngstu fóru á Fagrafjall og þau sem eru örlítið eldri fóru upp á Sjónvarpshæð. 5. og 6. bekkur fóru upp á Torfastaðanúp og sjöundi, áttundi og níundi bekkur fóru upp í Svínabakkafjall og þau elstu fóru upp á Krossavíkurfjöll. Veðrið lék við börnin og kennara þeirra í ferðinni en 20 stiga hiti var um hádegið. Myndirnar sem Bjarney G. tók fyrir ofan Svínabakka tala sínu máli.

Björgunarsveitin Vopni tók að sér hálendisvakt norðan Vatnajökuls í eina viku frá 5 til 12 ágúst. Ýmis smá atvik komu upp sem oftast reyndist auðvelt að leysa eins og straumleysi, bensínleysi og smábilanir. Algengt er að bílar og hjól taki vatn inn á sig í ám og þó sérstaklega í Lindánni við Herðubreiðarlindir eða Grafalandsánni. Það gerist vegna þess að menn fara of geyst út í vatnið því ekki er það svo mikið að venjulegir jepplingar komast yfir ef ekið er rólega. En ekkert alvarlegt kom upp þessa viku og er það gott.

Síðasti leikur Einherja í sumar var í dag á Frímerkinu. Veðrið var eins við mátti búsast, kalt og rigning. Leiknum lauk með jafntefli 2-2 og var Gunnlaugur Bjarnar Baldursson með bæði mörk Einherja og er markahæstur í sumar ásamt Garry Muckersie . Sindri var efstur í D riðli 3 deildarinnar og er með 26 stig eftir leikinn en Einheri er með 15 stig í 4 sæti.

Hinn slasaði er svissneskur ferðamaður sem var ásamt félögum sínum að skoða íshella þegar ís féll á fætur hans.
Þyrla frá Norðurflugi lenti á sjötta tímanum í gærdag í grennd við slysstaðinn en selflytja þurfti björgunarmenn frá Sigurðarskála í Kverkfjöllum á slysstaðinn. Þaðan báru björgunarmenn hinn slasaða um fimm hundruð metra yfir erfitt landslag og upp bratt einstigi....
Meira