í dag kl. 15:00 verður vinaskrúðganga. Lagt verður af stað frá Vopnafjarðarskóla og gengið að Kaupvangi. Göngunni lýkur með því að búið verður til stórt hjarta. Mætum öll og tökum þátt. Sjá nánar á http://kirkjan.is/hofsprestakall

Víkingur AK kom til Vopnafjarðar í morgun kl. 0930 með fyrsta loðnufarminn á vertíðinni, tæp 1000 tonn. Þetta er stór og góð loðna eða um 42 stk í kg. Loðnan fékkst í grænlensku lögsögunni norður af Horni. Um 250 sml. sigling var til Vopnafjarðar.

Ingunn er að landa 500 tonnum af síld en Lundey og Faxi eru á landleið undan brælu. Í gær var verið að skipa út 1600 tonn af frosnu en nú er verið að skipa út 1500 tonnum af lýsi.

Síldarvertíðinni er að ljúka og tekur þá við loðnuvertíð í beinu framhaldi en hér á Vopnafirði hefur verið stanslaus vinna frá því um miðjan júní og er unnið á vöktum allan sólarhringinn.

Dagur íslenskrar náttúru er í dag en hann er haldinn hátíðlegur í fyrsta sinn. Ákveðið var í fyrra, á sjötugsafmæli Ómars Ragnarssonar, að tileinka 16. september ár hvert íslenskri náttúru. Efnt verður til viðburða víða um land í tilefni dagsins. Í tilefni dagsins héldu kennarar og börn úr Vopnafjarðarskóla inn í Sandvík og hreinsuðu rusl úr þessari perlu sem Sandvíkin er.

Landhelgisgæslunni barst kl. 06:16 neyðarkall á rás 16 frá vélarvana 12 tonna línubáti sem leki hafði komið að í miðjum Seyðisfirði. Fjórir menn eru um borð. Ágætt veður er á svæðinu. Landhelgisgæslan hafði þegar í stað samband við sjóbjörgunarsveitir Slysavarnarfélagsins Landsbjargar á svæðinu og eru nú harðbotnabjörgunarbátar frá Seyðisfirði og Norðfirði, auk björgunarskipsins Hafbjargar frá Norðfirði á leið til aðstoðar.Sveinbjörn Sveinsson lagði af stað kl. 0630 en honum var snúið við þegar ljóst var að nægar bjargir væru komnar á svæðið.

Um síðustu helgi fóru smalar í Hauksstaðaheiði til að sækja þær skjátur sem bændur slepptu á fjall í vor. Oft hefur veðrið verið hagstæðara á smala og já stundum verra en ágætlega smalaðist þrátt fyrir það. Ástæðan er að sjálfsögðu sú að um einmuna lið smala var á ferð sem þekkir heiðarnar eins og lófana á sér, svo var líka gott veður á laugardaginn. Þegar smalar komu til byggða á sunnudaginn var hins vegar kalt og blautt og lítið skyggni en fólk lét það ekki á sig fá og voru þó nokkuð margir mættir í réttir til að berja safnið augum og spjalla við bændur og já, draga fé í dilka.