Á föstudaginn var farið í Heiðina á sleðum og keyrt upp á flest fjöll sem á leið manna urðu. Þegar að þjóðvegi 1 var komið í Langadal var afráðið að taka áhættuna og fara yfir veginn og gekk það bara ágætlega. Þegar þessum afanga var náð og menn búnir að jafna sig eftir afrekið var farið inn í Möðrudal þar sem bóndinn bauð okkur upp
á kaffi og kökur enda ekki á hverjum degi sem menn koma á sleðum frá Vopnafirði. Hafði Vilhjálmur bóndi orð á því að það hefði síðast gerst þegar hann var nýbúinn að kaupa „Gula vélsleðann" fyrir fermingapeningana.

Þegar búið var að drekka kaffið og spjalla stuttlega við Möðrudælinga var sett bensín á sleðana og haldið af stað í átt að Vopnafirði. Var farið yfir Einbúasand og Víðidalsfjallgarða og komið við í Vestarahúsi á Haug. Þaðan var farið í Austarahús síðan vestan og norðan við Mælifell og yfir Selá við Fagurhól og eins og leið liggur yfir í Vesturárdal.

Sleðafæri var með besta móti og sama hvar farið var, allt slétt og fellt .