Vopnafjörður / Fréttir / Um 3500 tonn af síld til Vopnafjarðar.

Um 3500 tonn af síld til Vopnafjarðar.

Lundey NS 14 - Mynd Jón Sigurðarson

Nú eru eftir um 9.200 tonn af hinum norsk-íslenska síldarkvóta HB Granda. Þar af er heimilt að veiða um 3.400 tonn í norskri lögsögu og 3.100 tonn má færa yfir á næsta ár gerist þess þörf.
Heldur hefur saxast á síldarkvótann upp á síðkastið þótt tíðarfarið hafi gert mönnum erfitt fyrir við veiðarnar.

Landað var úr Lundey NS á Vopnafirði í gær, alls tæplega 1.400 tonnum, og fór sá afli til bræðslu. Þá eru Faxi RE og Ingunn AK á leið til Vopnafjarðar með afla.

Samkvæmt upplýsingum Vilhjálms Vilhjálmssonar, deildarstjóra uppsjávarsviðs HB Granda, er Faxi RE á landleið með rúmlega 800 tonn af síld og er skipið væntanlegt til Vopnafjarðar um miðnætti í kvöld. Ingunn AK er sömuleiðis á landleið með um 1.300 tonna afla og er von á skipinu til hafnar á Vopnafirði í fyrramálið.

Mikil lægð er nú stödd austur af landinu og horfur á brælu næstu tvo dagana í hafinu milli Íslands og Noregs. Vilhjálmur segir að bræla sé hjá Faxa og Ingunni en bæði skipin sigldu vestur þegar þau lögðu af stað í gærmorgun og eru þau nú á lensi.

Að sögn Vilhjálms er gert ráð fyrir að Ingunn og Lundey haldi næst til síldveiða við Noreg en Faxi reyni við íslensku sumargotssíldina á heimamiðum.

Jón Sigurðarson | mánudagurinn 20. október 2008