Töðugjöld voru haldin í sveitinni í gær með góðri veislu í Staðarholti. Farið var í leiki með börnunum og ýmislegt annað gert til skemmtunar.
Hvað eru töðugjöld og slægjur?

Töðugjöld voru dálítill glaðningur, sem heimilisfólki var gefinn, þegar búið var að alhirða töðuna af túninu. Auðvitað fór það eftir efnum , ástæðum og lundarfari húsráðenda, hversu vel hann var útilátinn, en langalgengast mun hafa verið að gefa kaffi, sem einu sinni var reyndar hátíðardrykkur, og pönnukökur eða annað bakkelsi, sem á hverjum tíma þótti eftirsóknarverðast.

Brennivínstár gáfu þeir húsbændur, sem betur máttu og vildu. En matarveisla mun hafa verið sjaldgæf af þessu tilefni, enda númeti ekki enn á boðstólum. Miklu betur var veitt fyrr á tímum, þegar engjaslætti lauk og heyskapnum þar sem að fullu. Enda var þá oftast komið langt fram eftir september og fé komið af fjalli, svo að hægt var að slátra til veislunnar. Þessi matarveisla hét frá fornu fari slægjur, slagar eða slagi. Hún var algeng víðsvegar um land fram undir síðustu aldamót og sumstaðar lengur.