Skömmu eftir stofnun Slysavarnaskóla sjómanna var varðskipið Þór keypt af íslenska ríkinu til nota við fræðslu sjómanna í öryggismálum. Var skipinu gefið nafnið Sæbjörg og gerðar á því nauðsynlegar breytingar til að hægt yrði að halda uppi kennslu í bóklegum og verklegum fræðum um öryggismál sjómanna. Tilgangur með að hafa skip undir starfsemi Slysavarnaskóla sjómanna var sá að hægt yrði að fara með skólann á helstu verstöðvar landsins til námskeiðahalds.
 
Sumarið 1998 eignaðist Slysavarnafélag Íslands, nú Slysavarnafélagið Landsbjörg, nýtt skip til að leysa það eldra af hólmi. Þá gaf ríkisstjórn Íslands félaginu ferjuna Akraborg til nota fyrir starfsemi Slysavarnaskóla sjómanna. Skipið var þá um það bil að hætta siglingum vegna tilkomu Hvalfjarðarganganna. Var skipinu gefið nafnið Sæbjörg er það var afhent 12. júlí þ.á. Fóru fram umtalsverðar breytingar á skipinu svo það hentaði til nota sem skólaskip en starfsemi Slysavarnaskóla sjómanna hófst í nýrri Sæbjörgu í október 1998.

Frá byrjun maí til seinni parts septembermánaðar á hvert fer Sæbjörg milli hafna innanlands með námskeið fyrir sjómenn í öryggismálum.

Helstu mál:

Lengd: 68,79 m

Breidd: 11,15 m

Djúprista: 3,50 m

Brúttótonn: 1774 tonn

Aðalvélar: Nohab Polar 1700 kW.

Ganghraði: 11,5 hnútar

Áhöfn: 8

Smíðastaður: Trondhjems Mek. Verksted, Noregi 1974