Maður sem leitað var í allan dag eftir að báti hans hvolfdi við Skrúð í Fáskrúðsfirði í morgun fannst látinn í bátnum. Félaga mannsins var bjargað um borð í fiskibát eftir að hann skaut upp neyðarblysi úr gúmmíbát. Fyrsta útkall barst skömmu fyrir klukkan níu í morgun en þá hafði Vaktstöð siglinga árangurslaust reynt að ná sambandi við bátinn. Allar björgunarsveitir Slysavarnafélagsins Landsbjargar á Austurlandi kallaðar út og fór Vopni með 2 kafara til leitar og bíl til að auðvelda fjarskipti á svæðinu.