Vopnafjörður / Fréttir / Samstarf slökkviliða og leikskóla um eldvarnir og fræðslu.

Samstarf slökkviliða og leikskóla um eldvarnir og fræðslu.

Leikskólinn Brekkubær hefur undirritað samkomulag við Brunavarnir á Austurlandi um eldvarnir og fræðslu. Voru það Sandra Konnráðsdóttir leikskólastjóri og Baldur Pálsson slökkviliðsstjóri sem undirituðu samkomulagið sem felur í sér að leikskólinn og slökkviliðið taka höndum saman um að auka öryggi barna og starfsmanna leikskólans með öflugu eldvarnareftirliti og fræðslu. Samkomulagið er eftirfarandi:

Hlutverk slökkviliðsins:
Slökkviliðið heimsækir leikskólann tvisvar sinnum á ári hverju, samkvæmt samkomulagi við leikskólann.

Í fyrri heimsókn fara fulltrúar slökkviliðsins yfir ástand eldvarna með leikskólastjóra og öðru starfsfólki. Þegar verkefnið hefst með fyrstu heimsókn slökkviliðsins gera aðilar sem fyrr segir með sér samkomulag um eldvarnir og fræðslu. Þá afhendir slökkviliðið leikskólanum eftirfarandi gögn:

• Möppuna Eldvarnir í leikskólanum sem inniheldur ýmis gögn um verkefnið og eigið eldvarnaeftirlit.
• Veggspjald sem sýnir þau atriði sem aðgæta þarf mánaðarlega. Á því er gert ráð fyrir að merkt verði við þegar mánaðarlegt eftirlit hefur farið fram og hvenær rýmingaræfing var haldin. Nýtt veggspjald verður afhent árlega.
• Viðurkenningarskjöl fyrir öll börnin í elsta árgangi leikskólans hverju sinni.

Í síðari heimsókn hitta slökkviliðsmenn elsta árganginn á leikskólanum, ræða við börnin um eldvarnir, segja þeim frá starfi slökkviliðsmanna og sýna þeim ýmsan búnað. Þá afhendir slökkviliðið þessi gögn:
• Hvert barn fær möppuna Slökkviliðið mitt. Í henni eru verkefni fyrir börnin (sjá lýsingu síðar) og skilaboð til foreldra. Gert er ráð fyrir að börnin vinni verkefnin á leikskólanum en taki möppuna svo með heim með viðurkenningarskjalinu í.

Hlutverk leikskólans

Gert er ráð fyrir að samkomulag um eldvarnir og fræðslu sé undirritað í fyrstu heimsókn slökkviliðsins og það fari á vegg við inngang á allar deildir leikskólans svo foreldrum sé ljós tilvist þess og geti kynnt sér efni þess.

Samkvæmt samkomulaginu sér leikskólinn til þess að eldvarnir séu ævinlega í lagi. Í því skyni framkvæmir leikskólinn eigið eldvarnaeftirlit mánaðarlega samkvæmt gátlista hér í möppunni. Ennfremur gerir leikskólinn rýmingaráætlun og æfir rýmingu árlega samkvæmt leiðbeiningum.

Gert er ráð fyrir að börnin í elsta árganginum taki þátt í mánaðarlegu eftirliti ásamt starfsfólki, svo mörg
hverju sinni að allir fái að taka þátt að minnsta kosti einu sinni. Æskilegt er að starfsfólk gangi áður úr skuggaum að umrædd atriði séu í lagi. Þau fara síðan og aðgæta öll sex atriðin sem nefnd eru í gátlista og merkja jafnóðum við í gátlistann. Starfsmenn útskýra fyrir börnunum mikilvægi þess að umrædd atriði séu í lagi. Loks er merkt við í viðeigandi reit á veggspjaldinu til að staðfest að eftirlit hafi farið fram í viðkomandi mánuði. Veggspjaldið hangir uppi á áberandi stað á deildinni.

Þegar starfsmenn slökkviliðsins heimsækja leikskólann öðru sinni og síðan árlega upp frá því sýnir leikskólinnn fram á að mánaðarlegt eftirlit hafi farið fram og rýming hafi verið æfð á undangengnu ári, eða frá síðustu heimsókn. Enn fremur leggur leikskólinn þá fram umbeðin gögn.

Þegar slökkviliðsmenn koma í síðari heimsókn sér leikskólinn um að börnin skilji og leysi verkefnin í möppunni Slökkviliðið mitt og taki hana síðan með sér heim til að sýna foreldrum og forráðamönnum. Áður en að þessari heimsókn kemur hefur leikskólinn ritað nöfn allra barnanna á viðurkenningarskjöl sem afhent eru í fyrriheimsókn.

Jón Sigurðarson | laugardagurinn 17. nóvember 2007