Vopnafjörður / Fréttir / Nýtt fyrirtæki stofnað á Vopnafirði.

Nýtt fyrirtæki stofnað á Vopnafirði.

Það er ekki daglegt brauð sem Vopnfirðingar hafa ástæðu til að fagna stofnun nýs fyrirtækis en þeir höfðu það þriðjudaginn 08. apríl sl.þegar bókhaldsfyrirtækið Blikar ehf. var stofnsett fyrir skömmu og tók formlega til starfa þennan dag um leið og húsnæðið, nýendurgert, var vígt. Var mættur fjöldi fólks til samgleðjast hinum framtakssömu einstaklingum og fyrirtækjum er að Blikum og Skuldarhalla standa.

Mikil vinna hefur verið unnin í aðdraganda stofnunar Blika ehf. og verður áfram haldið að leita verkefna, m. a. til ríkisvaldsins sem boðað hefur stefnu "störf óháð staðsetningu". Endurskoðunarrisinn, KPMG, á 40% eignarhlut í Blikum ehf. og stærsti einstaki eigandi fyrirtækisins. Er það gríðarmikið spor að KPMG skyldi þekkjast boð um aðkomu að fyrirtækinu nýja, tryggð eru verkefni í báðar áttir. Enginn vafi leikur á að sú yfirgripsmikla þekking sem KPMG ræður yfir mun nýtast Blikum vel en 2 fulltrúar fyrirtækisins, Hlynur Sigurðsson og Magnús Jónsson, voru viðstaddir opnunina.

Auk framangreindra vígslna var undirritaður samningur um tryggingakaup Vopnafjarðarhrepps af VÍS en um árabil hafa aðilarnir átt fyrirtaks viðskipti og með nýjum samningi hefur sveitarfélaginu boðist samningur sem tryggir lækkun iðgjalda fyrir sömu þjónustu.

Jón Sigurðarson | fimmtudagurinn 10. apríl 2008