Það var á föstudaginn að ég nefndi það við félaga mína að ég hefði aldrei séð Flórgóða hér á Vopnafirði og líklega ekki nema einu sinni séð honum bregða fyrir við Mývatn. Það var því óvænt ánægja að sjá nokkra slíka í hóp við Lónabrúnna í mogun.

Flórgoðar eru einu fuglarnir af goðaætt sem finnast á Íslandi. Þeir búa sér til fljótandi hreiður á vötnum þar sem lífríkið er fjölskrúðugt. Flórgoðar eru fágætir fuglar en líklegast er að finna Þá við Mývatn þar sem mestur hluti stofnsins heldur til. Æti þeirra eru hornsíli og ýmis konar skordýr. Flórgoðum hefur fækkað jafnt og þétt alla síðustu öld þar til á síðustu árum að þeim fór að fjölga aftur. Nú er áætlað að um 300 pör verpi hér og 50 fuglar dvelji hér á landi vetrarlangt.

En ekki var nú allt upp talið því að í hópi Flórgoða, Skúfanda og Dugganda var ein Skeiðönd. Þær sjást ekki oft hér get ég fullyrt enda afar sjaldgæf.

Skeiðendur eru mjög sjaldgæfir varpfuglar á Íslandi. Þær finnast ekki á mörgum stöðum en einna helst í Þingeyjarsýslum. Talið er að varla séu fleiri en 30 varppör á landinu. Fyrst fara sögur af skeiðöndum hér á landi árið 1911 í Borgarfirði. Skeiðendur halda sig nálægt sjó á votlendissvæðum, einkum kringum vötn og tjarnir. Þær verpa 8-10 eggjum og stendur varpið yfir frá seinni hluta maí og fram í júní. Um fæðu skeiðanda hér á landi er lítið vitað annað en það að þær sía hana úr vatni gegnum kamba í stórgerðu nefinu. Skeiðendur eru alfriðaðar.

Ekki var allt búið enn því þarna voru líka tvær Brandendur.

Brandendur eru flækingar á Íslandi en hafa á síðustu árum verpt hér. Fyrsta staðfestingin á því fékkst 1990. Þar sem þessi fuglategund er "nýbúi" hér á landi er ekki tryggt að varpstofn nái sér á strik en þó eru taldar líkur á því. Kjörlendi brandanda eru leirur við ströndina þar sem þær bora eftir fæðunni með nefinu eða sía hana úr vatni og eðju. Fæða þeirra er mest hryggleysingjar. Varpið fer fram í maí og eggin eru 6-12 samkvæmt athugunum erlendis. Brandendur eru alfriðaðar hérlendis.