Í gær kvöld var Björgunarsveitin Vopni beðin um að aðstoða bílstjóra sem misst hafði bíl sinn útaf í vonskuveðri á Vopnafjarðarheiði. Sex menn á tveimur bílum voru sendir af stað um kl:21:00 og gekk ferðin hægt en nánast ekkert skyggni var á heiðinni.

Þegar upp var komið var annar bílstjóri búinn að koma þeim sem fastur var til bjargar og bíllinn kominn upp á veginn. Þá barst önnur beiðni en ökumaður sem lagði af stað frá Akureyri til Vopnafjarðar um kl:17:00 var týndur en síðast hafði heyrst í honum um 19:30 við Biskupsháls. Var haldið áfram inn heiðina á móts við þann ökumann og hittu okkar menn á hann við Kálffell og fylgdu honum til byggða.
Veður var afspyrnuslæmt og sá ekki á milli vegstika mest allann tímann.

Mokstur stendur yfir á helstu leiðum á Norðaustur- og Austurlandi en þar er skafrenningur og hálka, skv. upplýsingum frá Vegagerðinni. Ekkert ferðaveður er á Vopnafjarðarheiði og á Mývatns- og Möðrudalsöræfum en þar er þungfært og skafrenningur og beðið er með mokstur.