Í tilefni 120 ára afmælis Landsbankans var hið sögufræga Landsbankahlaup endurvakið í dag, 5. maí. Hlaupið var haldið með samræmdu sniði um allt land þ.e. á einum stað á höfuðborgarsvæðinu, í Laugardalnum og við 21 útibú bankans á landsbyggðinni. Öll börn á aldrinum 10-13 ára gátu tekið þátt í hlaupinu, hvar sem er á landinu.

Veitt voru verðlaun fyrir þrjú efstu sætin í hverjum riðli auk þess sem allir þátttakendur fengu medalíu. Að hlaupi loknu var haldin fjölskylduhátíð þar sem m.a. var boðið upp á grillaðar pylsur, drykki og gjafir fyrir hlaupara og systkini.

Landsbankahlaupið var fyrst haldið á 100 ára afmæli bankans árið 1986 og svo árlega eftir það í 14 ár. Muna eflaust margir eftir því en hlaupið naut alltaf mikilla vinsælda því á hverju ári hlupu nokkur þúsund börn á öllu landinu og kepptu sín á milli af mikilli alvöru.

Landsbankahlaupið hefur frá upphafi verið samstarfsverkefni Landsbankans og Frjálsíþróttasambands Íslands og er svo einnig nú en Frjálsíþróttasambandið annast alla tæknilega umsjón með hlaupinu. Öll framkvæmd er með svipuðu móti og á árum áður.