Á uppstigningadag var formlega afhentur nýr slökkvibíll á Slökkvistöð Vopnafjarðar. Bíllinn var keyptur í samstarfi Vopnafjarðarhrepps og Flugstoða ohf. (ISAVIA) og er ljóst að hann eykur til muna öryggi í slökkviliðsmálum á Vopnafirði. Bíllinn mun bæði þjóna íbúum og fyrirtækjum Vopnafjarðarhrepps ásamt viðbúnaðarþjónustu á Vopnafjarðarflugvelli. 

Bíllinn, sem er af gerðinni Scania var keyptur af fyrirtækinu Sigurjóni Magnússyni ehf. á Ólafsfirði að undangengnu útboði og er allur af fullkomnustu gerð miðað við tæki í þessum geira. Óhætt er að segja að framleiðandinn Sigurjón Magnússon ehf. hafi staðið sig af stakri prýði og uppfyllt alla staðla sem upp voru settir í kröfulýsingu um bílinn. Heildarkostnaður við smíði bílsins var 38,7 m. kr. með virðisaukaskatti.

 Í þessu tilefni var opið hús í slökkvistöðinni 13. maí sl., þar sem fjölmenni mætti og fagnaði þessum tímamótum í öryggismálum Vopnfirðinga. Skoðaði tækjabúnað slökkvistöðvarinnar, að öðru leyti, undir öruggri leiðsögn slökkviliðsmanna, sem sýndu tilþrif í notkun öryggistækja stöðvarinnar. Við þetta tilefni var einnig skrifað undir samning á milli Vopnafjarðarhrepps og Flugstoða (ISAVA) um rekstur á bílnum.

 Vopnfirðingum er óskað til hamingju með þennan merka áfanga í öryggismálum sveitarfélagsins.

Undir þetta skrifar Sveitastjóri.