Vopnafjörður / Fréttir / Friðrik Ómar heimsækir Austurland

Friðrik Ómar heimsækir Austurland

Friðrik Ómar

Söngvarinn Friðrik Ómar heimsækir Austurland í tónleikaferð sinni um landið sem hefst nú í vikunni. Friðrik þarf vart að kynna en þessi 26 ára gamli söngvari hefur skipað sér í röð fremstu söngvara landsins á örskömmum tíma.

Þetta er í fyrsta sinn sem Friðrik fer eins síns liðs um landið en hann hefur áður sungið með Guðrúnu Gunnarsdóttur og fylgt eftir þrem gullplötum þeirra sl. ár með því að syngja í kirkjum landsins. Að þessu sinni er það Grétar Örvarsson sem leikur undir á píanó og á efnisskránni eru meðal annars lög sem Vilhjálmur Vilhjálmsson gerði vinsæl og fleiri þekkt dægurlög sem Friðrik hefur gaman af að flytja.

"Ég hlakka mikið til að koma austur. Fyrir utan hvað er fallegt þarna þá hef ég td. aldrei sungið á Eskifirði eða Höfn í Hornafirði. Ég söng á Seyðisfirði með Guðrúnu í fyrra og líkaði rosalega vel við Bláu Kirkjuna og hlakka mikið til að hefja tónleikaferðina þar. Vopnfirðingar eru mér að góðu kunnir en þar fékk ég fyrst greitt fyrir að syngja 14 ára gamall. Síðan þá hef ég oft komið þangað og skemmt Vopnfirðingum og nærsveitarmönnum" segir Friðrik Ómar. "

Ég get lofað þægilegri stund fyrir alla aldurshópa og góð lög sem allir þekkja munu hljóma í hugljúfum útsetningum og kannski eitthvað eurovision líka, hver veit?" segir Friðrik og hlær.

16. sept: Bláa Kirkjan, Seyðisfirði

17. sept: Félagsheimilið Mikligarður, Vopnafirði

18. sept: Kirkju- og menningarmiðstöðin Eskifirði

19. sept: Hafnarkirkja, Höfn í Hornafirði

Allir tónleikarnir hefjast kl. 20:30 og eru miðar aðeins seldir við innganginn. Miðaverð er 1500.-

Jón Sigurðarson | mánudagurinn 15. september 2008