Í gær var stofnaður skokkhópurinn Drekinn á Vopnafirði en það var Pétur Frantzson fyrrum kyrrsetu- og stórreykingamaður sem kom og gaf ráðgjöf en hann snéri blaðinu við fyrir um 16 árum og fór að hreyfa sig.

Í viðtali við Morgunblaðið segist Pétur lengi hafa furðað sig á því hvað hlaupið er á fáum stöðum á landinu utan höfuðborgarsvæðisins en á þeim stöðum sem hlaupahópar eru til staðar, líkt og á Selfossi og Ísafirði, ríkir mikill áhugi. Hann tók því saman við Adidas og er nú á ferð um byggðir landsins í því skyni að vekja áhuga fólks á hlaupi og stofna hlaupahópa. Þegar blaðamaður náði sambandi við Pétur í gær var hann staddur á Vopnafirði en í dag verður hann í Neskaupstað og á morgun á Reyðarfirði og Egilsstöðum.

„Hérna á Vopnafirði er langmesti áhuginn, alveg dúnduráhugi," segir Pétur. „Þau eru búin að setja sér markmið og fylla út skýrslur þannig að þau verða að standa við það og þetta er bara mjög gaman." Sem dæmi um markmið má nefna hópinn á Vopnafirði. Samkvæmt áætlun sem Pétur lagði fyrir hlauparana eiga allir að geta hlaupið frá bænum og að sundlauginni eftir átta vikur en fjarlægðin er 12 km. Það verður gert eitt föstudagskvöldið og verður grillað hjá sundlauginni.

Spurður hvort slíkt sé raunhæft fyrir óvanan hlaupara segir Pétur það vel hægt sé planinu fylgt. Þolið byggist hratt upp með reglulegum æfingum.

Æfingar eru á þriðjudögum og fimmtudögum kl 17:30 og laugardögum kl 09:30. Lagt er af stað frá íþróttahúsinu.

Leiðbeinandi hópsins er Bjarney Guðrún Jónsdóttir ( bjarney@vopnaskoli.is)