Hinn slasaði er svissneskur ferðamaður sem var ásamt félögum sínum að skoða íshella þegar ís féll á fætur hans.
Þyrla frá Norðurflugi lenti á sjötta tímanum í gærdag í grennd við slysstaðinn en selflytja þurfti björgunarmenn frá Sigurðarskála í Kverkfjöllum á slysstaðinn. Þaðan báru björgunarmenn hinn slasaða um fimm hundruð metra yfir erfitt landslag og upp bratt einstigi.

Það gekk þó með eindæmum vel og er sá slasaði nú á sjúkrahúsi þar sem gert verður að sárum hans. Björgunarmenn þurftu að ganga niður jökulinn og koma sér heim en siðustu menn voru að koma heim um miðja nótt. Aðgerðin gekk mjög vel með samstilltu átaki björgunarsveitarmanna, landvarða á svæðinu, lögreglu og annarra viðbragðsaðila en segja má að veður og aðstæður á svæðinu hafi verið með besta móti.