Árshátíð skólans var með sama sniði og undanfarin ár. Undirbúningur og æfingar taka tíma frá hinu hefðbundna námi en í þess stað læra nemendur ýmislegt sem ekki nýtist þeim síður í framtíðinni. Þar má nefna tjáningu, framsögn, framkomu, einbeitingu, aga og hegðun á svona samkomum.

Árshátíðardagurinn er með sérstökum hætti en allir nemendur og starfsfólk koma á einhvern hátt að hátíðinni. Kaffihlaðborð var í hléi eins og undanfarin ár og mikið var um bakkelsi og annað góðgæti sem nemendur komu sjálfir með.

Mörg góð leikrit voru á fjölum Miklagarðs í kvöld og stóðu nemendur sig alveg frábærlega eins og alltaf og var mikið hlegið og ekki annað að sjá á sýningargestum en að þeir skemmtu sér vel.