Þrettán tilboð bárust í lagningu nýs Norðausturvegar milli Bunguflóa og Vopnafjarðar og hluta Hofsárdalsvegar og voru tilboðsfjárhæðir allt frá rúmum 2,7 milljöðrum í 738 milljónir króna. Kostnaðaráætlun Vegagerðarinnar hljóðaði uppá 1.440 milljónir króna.
Lægsta tilboð átti verktakinn Hektar ehf. í Kópavogi, kr. 738.179.500, sem er 51,3% af kostnaðaráætlun, en það hæsta var frá Magna ehf. í Kópavogi kr. 2.763.243.000, sem er 191,9% af kostnaðaráætlun. Aðeins tvö tilboð voru yfir áætluðum verktakakostnaði. Verkið var einnig auglýst á evrópska efnahagssvæðinu, að því er segir á vef samgönguráðuneytisins.

Verkefnið snýst um lagningu nýs vegar milli Bunguflóa og Vopnafjarðar og hluta Hofsárdalsvegar. Norðausturvegur verður um 30,4 km langur og Hofsárdalsvegur (920), liggur milli nýja Norðausturvegarins í Vesturárdal og Árhvamms í Hofsárdal og verður 6,8 km langur. Endurbæta þarf 0,85 km af Skógavegi (914) og verða nýjar tengingar um 1,6 km að lengd.

Lagningu slitlags á Norðausturveg skal lokið fyrir 15. ágúst 2011 og verkinu skal að fullu lokið fyrir 15. nóvember 2012.

Unnið er nú við fyrri áfanga verksins, nýjan veg milli Hringvegar og Bunguflóa, en samið var við Suðurverk um þann verkhluta.